Ámbito Cultural de Santiago de Compostela acolle a mostra “Toma castaña. Galicia”, unha iniciativa da Dirección Xeral de Patrimonio Natural da Xunta de Galicia, que busca poñer en valor o amplo e valioso patrimonio natural dos bosques galegos.

24 paneis informativos que se presentan ordenados respectando as dúas seccións que compoñen o Catálogo galego de árbores singulares: árbores (18) e formacións (4). Dentro de cada dunha destas seccións, o ritmo da exposición segue a orde cronolóxica no que foron incluídos no devandito catálogo.

Abre a exposición o Castiñeiro da Capela, localizado na igrexa de Baamonde, Begonte, Lugo, seguindo por outros 17. O Castiñeiro de Ramil con 850 anos de vida, está situado no Camiño Francés a un 1 km de Triacastela, Lugo ou o Castiñeiro de Cerdedelo, situado na aldea do mesmo lugar, Laza, Ourense, como o máis alto, con 31,10 m., son algúns dos exemplares que conforman a exposición, xunto coas formacións arbóreas destacadas: Fraga de Catasós, situada en Lalín, Pontevedra; Souto de Rozavales, situado en Manzaneda, Ourense; Castiñeiros de Os Blancos, situados en Os Blancos, Ourense e Souto da Ruibal, situado en Folgoso do Caurel, Lugo.

Ámbito Cultural mostra o seu apoio ao patrimonio natural de Galicia, conscientes de que non se coida nin valora o que non se coñece.

Achégache a gozar dun percorrido polos impresionantes castiñeiros singulares de Galicia. Árbores que forman parte do valioso legado do patrimonio natural galego, e que nos regalan cada outono os seus froitos, as castañas.

A mostra poderá visitarse en horario comercial de luns a venres de 10 a 22 h, do 15 de xullo ao 6 de setembro.